फोहोरबाट सिलिण्डरमै बायोग्याँस

पोखरा । कुहिने फोहोरलाई बायोग्याँस प्लान्टमा ल्याएर पोखरामा ग्याँस तथा प्राङ्गारिक मलको उत्पादन थालिएको छ ।

पोखरा महानगरपालिकाको मझुवामा साढे दुई वर्ष लगाएर बायोग्याँस प्लान्ट निर्माण गरिएको हो ।

उत्पादित ग्याँसलाई सिलिण्डरमै भरेर पोखराका उद्योग रेस्टुराँमा आपूर्ति गर्न थालेको गण्डकी ऊर्जा प्रालिले जानकारी दिएको छ ।

दैनिक ४५ टन फोहोर खपत क्षमताको उक्त प्लान्टबाट दैनिक दुई सय सिलिण्डर ग्याँस उत्पादन गर्न सकिन्छ तर अहिले १८ टन फोहोर खपत गरेर दैनिक ४० सिलिण्डर ग्याँस मात्र उत्पादन भइरहेको कम्पनीले जनाएको छ ।

गण्डकी ऊर्जा प्रालिका सञ्चालक कुशल गुरुङका अनुसार ४० हजार घनमिटर क्षमताको प्लान्टबाट निस्कने लेदोलाई प्रशोधन गरेर प्राङ्गारिक मल समेत उत्पादन थालिएको छ ।

प्लान्टमा अहिले गाईवस्तुको गोबर, कुखुराको सुली, बँगुरको लिदी, उखुको छोक्रा, बियर कारखानाबाट निस्कने फोहोर प्रयोग गरिएको छ । यो खबर आजको गोरखापत्र दैनिकमा छ ।