मिडिया विधेयकमा संशोधन दर्ता

काठमाडौँ: पत्रकार आचारसंहिता उल्लङ्घनका घटनामा प्रचलित कानुनबमोजिमको कारबाही र जरिवानाको व्यवस्था खारेज गरी विधेयक परिमार्जन गर्न प्रमुख विपक्षी दल नेपाली काँग्रेसले मिडिया काउन्सिल विधेयकमा संशोधन दर्ता गरेको छ ।

काँग्रेसका राष्ट्रिय सभा दलका नेता सुरेन्द्र पाण्डे तथा राधेश्याम अधिकारीसहितका सांसदहरूले संशोधन दर्ता गर्नुभएको हो । विधेयकको प्रस्तावना, साङ्गठनिक संरचना, पदाधिकारी सिफारिसको व्यवस्था, जरिवानाको व्यवस्थालगायत २६ बुँदे संशोधन विपक्षी दलले दर्ता गरेको छ ।

सत्तारूढ दलसमेतले विधेयकमा साझा प्रस्तावको गृहकार्य गरे पनि काँग्रेसले फरक संशोधन दर्ता गरेको हो । सत्तारूढ दल नेपाल कम्युनिस्ट पार्टी (नेकपा)ले भने सोमबार मात्र संशोधन दर्ताको तयारी गरेको छ । संशोधन दर्ताको समय पनि सोमबार मध्याह्नसम्म तोकिएको छ ।

यो खबर आजको गोरखापत्र दैनिकमा छापिएको छ ।